നഖത്തിന്റെ വളർച്ച

മാംസത്തിനകത്തു നിന്നും പുറത്തേക്ക് ആരോ തള്ളിവിടുന്നതുപോലെയാണ് നഖത്തിന്റെ വളർച്ച കണ്ടാൽ തോന്നുക.ചർമ പുറംപാളിയുടെ കെരാറ്റിൻ അടുക്ക് രൂപാന്തരം പ്രാപിച്ചുണ്ടാക്കുന്ന കെരാറ്റിൻ തകിടുകളാണ് നഖങ്ങൾ. നഖത്തിന്റെ കാണാൻ കഴിയാത്ത കടഭാഗം അഥവാ നഖമൂലത്തിന്റെ (The nail root) ഇരുവശത്തുമുള്ള കോർണിയോ സൈറ്റുകളാണ് ഇതിനുവേണ്ട കെരാറ്റിൻ നൽകുന്നത്. ഉള്ളിൽ കെരാറ്റിൻ നിറച്ച് കോർണിയോസൈറ്റ് കോശങ്ങൾ നഖമൂലത്തിലേക്ക് കൊഴിഞ്ഞുകൊണ്ടിരിക്കും. അനുസ്യൂതം തുടർന്നുകൊണ്ടിരിക്കുന്ന പ്രക്രിയയാണിത്. മുന്നേ  കൊഴിഞ്ഞുവീണവ പുറകേ കൊഴിയുന്നതിന്റെ തിരക്കിൽപ്പെട്ട് മുന്നോട്ട് നീങ്ങിക്കൊണ്ടിരിക്കും നഖം പുറത്തേക്ക് നീങ്ങുന്നതും ഇതുകൊണ്ട് തന്നെ. നഖമൂലത്തിനോട് ഒട്ടിച്ചേരാനായി കൊഴിഞ്ഞുവീണ കോർണിയൊസൈറ്റുകളുടെ ശേഖരത്തെ മാട്രിക്സ് (Matrix)എന്നുപറയുന്നു.

                                       

അകവശത്തുള്ള മാട്രിക്സിന്റെ മുന്നേറ്റമാണ് നഖത്തിന്റെ കടഭാഗത്ത് ചന്ദ്രക്കലപോലെ കാണുന്ന ലൂണ്യൂൾ. നഖത്തിന്റെ നല്ലൊരുഭാഗവും ഉണ്ടാവുന്നത് ഇതിൽ നിന്നാണ്. ലൂണ്യൂൾ തള്ളവിരലിൽ വ്യക്തമായി കാണാനാവും.ചന്ദ്രക്കല കഴിഞ്ഞുള്ള ഭാഗത്ത് കെരാറ്റിനൊന്നുമില്ലെങ്കിലും നഖത്തിന് നന്നായി ഉറച്ച് ഒട്ടിനിൽക്കാനുള്ള സൗകര്യം പിങ്ക് നിറമുള്ള ഇവിടെയുണ്ട്.നഖത്തിനിടയിൽ നിഴലടിച്ചുകാണുന്ന ഈ ഭാഗമാണ് നഖശയ്യ(Nail bed).